Começa a programaçom da Associaçom José Afonso na Galiza “Abril em Dezembro”

A Associaçom José Afonso – Galiza  apresentou a programaçom “Abril em Dezembro” que desenvolverá durante o mês de dezembro, com um concerto e com umha exposiçom sobre o Zeca Afonso. Na roda de imprensa de apresentaçom intervinhêrom Odilo G. Carnero, em representaçom da AJA-Galiza; Adolfo Muíños, alcalde de Rianjo; e Xurxo Couto, responsável de Cultura na Deputaçom da Corunha.

O concerto, que se celebrará no Paço de Rianjinho ou no Auditório municipal de Rianjo en funçom das condiçons meteorológicas, contará com a interpretaçom de temas do repertório de José Afonso por parte dos músicos Tiago Fernandes e Jasper. Este evento será o domingo 13 de dezembro em sessom vermute às 12h00 e será emitido por streaming. As pessoas que desejarem assistir ao vivo, deverám registrar-se na web www.aja.gal ou enviar um correio electrónico para info@aja.gal, dado que as praças fôrom limitadas polas medidas de prevençom da pandemia da covid-19. A programaçom conta com a colaboraçom do Concelho de Rianjo e da Deputaçom da Corunha.

Tiago Fernandes toca e canta originais e versons dos mais considerados artistas portugueses, como José Afonso, Sérgio Godinho, José Mário Branco, Samuel Úria, Capicua, Deolinda, Ary dos Santos, Fernando Pessoa, Luís de Camões ou Xutos e Pontapés. Compartiu cenários com artistas nacionais e internacionais como Uxía, Manuel Freire, Vitorino, Filipe Raposo, Francisco Fanhais, Xico de Carinho, José Fanha, Janita Salomé, Luanda Cozzeti e Selma Uamusse, entre outros. Está especializado em concertos didácticos.

Pablo Carracedo “Jasper” é o artista que liderou o grupo de rock NAO, con diversos discos publicados como “As palabras espidas”, “Coas túas mans”, “Cancións de amor e liberdade”, “Soñar e crear” e “Ata que o lume se apague”, entre outros. As letras das suas cançons distinguem-se polo compromiso político e a crítica social. En 2014 ganhou o Prémio Martín Códax da Música. Nesta ocasiom, interpretará repertório clássico de José Afonso e temas próprios.

Ademais, a Associaçom José Afonso – Galiza instalou em Rianjo a exposiçom didáctica “José Afonso, Geografias de uma vida” com fotografías, documentos e textos informativos. Esta mostra pode ser visitada desde 10 de dezembro no Quartel Velho de Rianjo, situada na praça de Castelao, com entrada livre e de balde.

Esta exposiçom fai parte do trabalho da AJA para difundir a obra do Zeca na Galiza e foi concibida como umha primeira aproximaçom que procura compreender a sua vida e as influências musicais e reivindicativas do seu périplo de Aveiro para Angola e Moçambique (África) e de Belmonte para Coimbra e Setúbal (Portugal). Os painéis desta mostra, que já visitárom diversas vilas e cidades de Portugal, chegam a Rianjo da mao da Associaçom José Afonso – Galiza com a colaboración da Deputaçom da Corunha.

Deste jeito, a AJA-Galiza reprogramou actividades previstas para a semana de 25 de abril de 2020 no seu compromisso com a cultura, com a reivindicaçom social e com a difusom do legado de José Afonso, que estavam organizadas junto com a Gentalha do Pichel e com a colaboración da Deputaçom da Corunha, e que tivêrom que ser adaptadas a formato online por causa das medidas de confinamento sanitário para a prevençom da pandemia da covid-19, enquanto outras ficárom adiadas, mas nom canceladas.

Na altura, o 25 de abril também foi celebrado com um programa virtual de actividades que pode ser consultado na web de AJA e nos seus perfis nas redes sociais. Assim, esta exposiçom materializa a disposiçom da associaçom para realizar o trabalho anual previsto com o objetivo de prosseguir o seu labor de difusom da obra de José Afonso na Galiza.