AJA Galiza organiza o ato “José Afonso e Benedicto, vozes da liberdade”

A Associaçom José Afonso (AJA – Galiza) organiza o ato “José Afonso e Benedito, vozes da liberdade” este domingo 9 de Maio às 12h00 para comemorar o histórico concerto de 1972 no Burgo das Naçons, em Santiago de Compostela, unido à programaçom da Revoluçom dos Cravos deste ano.

Este evento contará com a atuaçom de Falua e as intervençons de Odilo González, presidente da AJA-Galiza, e de Mercedes Rosón, concelheira de Cultura em Santiago. Ademais, instalará-se umha placa comemorativa e descubrirá-se o mural de grande formato “José Afonso e Benedicto, vozes da liberdade”, que mide 12 x 2,5 metros e pretende transmitir às geraçons presentes e futuras de estudantes aquele acontecimento e os valores que cantavam.

Com esta celebraçom, a AJA-Galiza quer reconhecer a importáncia de Benedicto García Villar na vinculaçom de José Afonso com a Galiza. Benedicto, um dos rostos visíveis de “Voces Ceibes”, viaja em Abril de 1972 a Setúbal, em Portugal, para conhecer José Afonso, e estabelece amizade con ele. Convida-o a realizar umha primeira gira, entre a que se topava aquele concerto do Burgo das Naçons para estudantes. Foi neste espaço que o Zeca cantou pola primeira vez em público o icónico “Grândola, Vila Morena”, dous anos antes de se converter no símbolo da revoluçom em Portugal.

O propio José Afonso manifestou que, por mediaçom de Benedicto, conheceu na Galiza “umha certa forma de resistência ao franquismo, umha resistência cultural e política”. “A primeira vez que cantei Grândola em público foi na Galiza. A malta estusiasmou-se. Criou-se um efeito de fraternidade muito intenso. Punham-se de pé, cantavam, agitavan os braços… Foi a experiencia mais maravilhosa, algo especial. Talvez ninguém me entendesse como na Galiza”, manifestou José Afonso numha entrevista realizada com posterioridade.

Entre os anos 1972 e 1974 Benedicto acompanha José Afonso em distintas giras e mesmo gravam um disco conjunto. Já depois da morte do Zeca, Benedicto foi o impulsor de diversas conferências e homenagens à sua pessoa, espalhando a sua música e reivindicaçons de democracia entre a sociedade galega da época. 

A AJA-Galiza quer agradecer a familia e amizades de Benedicto, pessoas associadas, estudantes, Gentalha do Pichel, Concello de Santiago, Universidade de Santiago e à residência do Burgo das Naçons a sua participaçom e colaboraçom neste ato para que estudantes de hoje e de amanhá conheçam a mensagem na procura da liberdade que deixárom pessoas como José Afonso e Benedicto.

Dentro das atividades desta comemoraçom, a AJA Galiza colabora também com o seu assessoramento e participaçom no documentário “Zeca 1972 Galiza”, que se projectará o sábado 8 de Maio às 19h30 na Gentalha Do Pichel, produzido por Xarda e Nós Televisión.

This message is only visible to admins.
Problem displaying Facebook posts. Backup cache in use.
Click to show error
Error: Error validating access token: The session has been invalidated because the user changed their password or Facebook has changed the session for security reasons. Type: OAuthException