Na tarde de ontem, 12 de Dezembro, foi apresentado ao público o livro Zeca Afonso para crianças, editado pola Escola de Ensino Galego Semente Compostela. A apresentaçom correu a cargo do Odilo González, da AJA Galiza, e do Bruno Vilela, coordenador do projeto, e foi acolhida pola livraria Pedreira, que já tem emprestado o seu local em outras ocasions e ao que agradecemos sempre a boa disposiçom.

O Zeca Afonso para crianças nasceu como ideia de um livrinho editado em Moçambique por crianças de umha escola que desenharam, com as suas próprias maos, frases de cançons de José Afonso; mas também da necessidade — urgente na Galiza — de criar e disponibilizar recursos culturais para crianças na nossa língua, num contexto de substituiçom acelerada de referentes galegos por referentes espanhóis nessas idades. Trata-se, por palavras de Bruno Vilela, de que as crianças acedam ao legado universal do Zeca, que tem uma leitura para adultos que pode mais tarde ser redescoberta, mas também pode ser desfrutado por crianças com umha leitura mais infantil das suas cançons.

O livro recolhe umha seleçom de doze letras de José Afonso ilustradas por Elga Fernández Lamas, Andrea López Álvarez e Karina Mouriño, que participárom no projeto de maneira altruísta, mais umha série de códigos QR que podem ser rastejados com os telemóveis para entrar num canal de reproduçom em YouTube com as cançons de José Afonso, colectadas dentre as que circulam já hoje pola rede.

Como indica a Semente Compostela:

O Zeca nom é umha peça de museu, o Zeca é umha introduçom à poesia e à música, a valores de solidariedade, amizade, justiça e rebeldia e também ao divertimento. O Zeca nom é para estar numha prateleira ou escuitar só cada 25 de abril, o Zeca é companheiro e recurso para ter presente, à mao. Com este projeto as Escolas de Ensino Galego Semente queremos propiciar um primeiro contacto das crianças com as letras, música e a voz do próprio José Afonso com a esperança de, umha vez feita esta primeira apresentaçom, as crianças e as crescidas poderem achegar-se à sua obra e emocionarem-se ao transitar por este trilho de palavras e música onde versos muitas vezes cantados adquirem o seu verdadeiro peso ao serem percebidas e interpretadas com a chave que vai dando o passar do tempo: a madureza. Conhecer e cantar o Zeca só pode fazer melhores as pessoas e com elas o mundo em que vivemos.