Do dia 15 ao 31 de outubro, a Associaçom José Afonso — Galiza manterá em exposiçom o conjunto dezoito de painéis intitulado José Afonso – Geografias de uma vida. Será no Centro Sócio-Cultural do Ensanche de Santiago de Compostela, na rua Frei Rosendo Salvado, 14-16, com entrada de graça e visita livre.

Deste modo, a AJA Galiza cumpre com umha das atividades que estavam programadas para a comemoraçom da Revoluçom dos Cravos que promove anualmente, e que este ano 2020 deveu ser adiada por causa das medidas sanitárias de confinamento decretadas pola pandemia de Covid-19. Na altura, o 25 de Abril foi celebrado igualmente com um programa virtual de atividades que pode ser consultado na própria web da AJA e nos seus perfis nas redes sociais. Contodo, esta exposiçom materializa a vontade da Associaçom de realizar os trabalhos previstos assi que fosse possível e seguro.

Esta exposiçom fai parte dos trabalhos da AJA para difundir a figura e a obra do Zeca, e foi concibida como umha primeira aproximaçom que procura entender a obra do cantor do «Grândola, vila morena» a partir das diferentes geografias que fam parte da sua vida, desde Aveiro a Angola, Moçambique, Belmonte e Coimbra, seguindo mais tarde para Setúbal.

Os painéis, que já percorrêrom multidom de vilas e cidades de Portugal, chega pola primeira vez à Galiza da mao da Associaçom José Afonso — Galiza, que conta com a colaboraçom económica da Deputaçom da Corunha e do Concelho de Santiago.