Tal como previsto, o domingo 13 de dezembro, correu no Paço de Rianjinho da vila galega de Rianjo o concerto «Abril em Dezembro», organizado pola AJA Galiza com a colaboraçom da cámara municipal rianjeira e da Deputaçom da Corunha. O concerto, que se complementa com a exposiçom «José Afonso. Geografias de uma vida» que pode ser vista no Quartel Velho da mesma vila, reuniu os músicos Jasper (Galiza) e Tiago Fernandes (Portugal) com o objetivo de comemorar, mesmo que em Dezembro, os acontecimentos de 25 de Abril de 1974 em Portugal.

Com efeito, o concerto e a exposiçom som as atividades que o núcleo galego da Associaçom José Afonso recuperou das que tivêrom de ser adiadas ou adaptadas em Abril, quando a celebraçom se realizou através da internet debido às restriçons sanitárias impostas pola pandemia de Covid-19. Na altura a AJA contara já com ambos os músicos que se pudêrom ver em Rianjo, e que enviaram interpretaçons de temas de José Afonso e José Mário Branco gravadas em casa por si próprios, e também com Margarita Ledo e Mário Correia, que participaram do mesmo modo. As gravaçons, de interesse artístico e informativo, podem ser acessadas nos perfis da AJA nas redes sociais ou na própria web.

Já no concerto, que finalmente tivo de ser num dos espaços interiores do Paço, em lugar de nos exteriores, Jasper interpretou temas de José Afonso, de Suso Vaamonde e da sua própria autoria, e Tiago Fernandes trouxo um repertório de músicas da cançom política portuguesa e de poemas da altura.

Ademais, o concerto «Abril em Dezembro» contou também com emissom ao vivo através do canal de Youtube da AJA Galiza, onde pode ser visto em alta qualidade, dentro do compromisso da associaçom de dar a máxima difusom ao encontro e facilitar a participaçom do maior número de pessoas — incluídas aquelas que nom se puderam deslocar ao Paço para assistir ao concerto.