Celebrados diversos atos de apresentaçom do livro de cançons do Zeca

O livro durante a apresentaçom em Compostela

Entre os dias 23 e 27 de novembro fôrom celebrados atos de apresentaçom do livro José Afonso, Todas as Canções. Partituras, letras e cifras, que vem de ser ré-editado pola Associação José Afonso. Os atos acontecêrom em diversas cidades e vilas da Galiza (Vigo, Vila Garcia, Corunha, Ferrol e Compostela) a seguir da apresentaçom inicial em Lisboa, e ainda continuarám em vindeiras datas noutras localidades portuguesas. A AJA portuguesa e a AJA Galiza continuam, assim, a estreitar os laços a ambas as margens do Minho e a tecer colaboraçom com outras entidades e associaçons locais.

Várias das apresentaçons galegas fôrom, ademais, acompanhadas da música de Xico de Carinho, Su Garrido, César Morán Grupo, Maria Manuela e Manolo Bacalhau, que emarcárom as palavras de Henrique Marques e António Pimenta (ambos em representaçom da AJA) e do músico e co-autor do livro, Guilhermino Monteiro.

O livro José Afonso, Todas as Canções. Partituras, letras e cifras reune as partituras, letras e diagramas de acordes de todas as 159 cançons da autoria de José Afonso, compiladas e transcritas por Guilhermino Monteiro, José Mário Branco, João Lóio e Octávio Fonseca.

Como foi destacado em várias das apresentaçons, o livro pode ser consultado de diversas maneiras. Em primeiro lugar, como repositório escrito das músicas do artista, o que permitirá estudar a sua obra nas suas complexidades, e desterrará a errada ideia de que a música de intervençom foi, no Portugal da década de 1970, umha produçom banal e sem qualquer profundidade. Ademais, ao incorporar todas as letras, o livro pode ser consultado como compilaçom de poemas, afirmando José Afonso como um dos mais interessantes letristas portugueses.

A ediçom é ainda de maior interesse por se dar imediatamente à soluçom dumha parte dos problemas que acarretavam os direitos autorais de José Afonso, em maos de diversas editoras e discográficas que bloqueavam a reproduçom da maioria da sua obra. O livro, que tem um custo de 15€, pode já ser comprado na Galiza nas livrarias Cartabón (Vigo), Pedreira (Compostela), Follas Novas (Vila Garcia), Paz (Ponte Vedra), Suevia (Corunha) e Ateneo Ferrolán (Ferrol), bem como diretamente através da AJA Galiza.

Como final dos atos, após a apresentaçom em Compostela, membros de ambas as AJA tivemos oportunidade de manter umha comida de convívio que continuou com visita aos diferentes lugares vinculados com a presença do Zeca na capital galega, desde o Burgo das Naçons — onde o Grândola foi pola primeira vez cantado diante dum grande auditório e onde a AJA pintou um mural em honra à amizade de José Afonso e Benedicto — ao Parque José Afonso.

This message is only visible to admins.
Problem displaying Facebook posts. Backup cache in use.
Click to show error
Error: Error validating access token: The session has been invalidated because the user changed their password or Facebook has changed the session for security reasons. Type: OAuthException