a AJA Galiza
comemora mais um ano
o 25 de Abril

A Associaçom José Afonso – Galiza organiza mais um ano um programa de atividades para comemorar a Revoluçom dos Cravos, com umha exposiçom, concertos, apresentaçons de livros, um espetáculo infantil e umha ceia de convívio para lembrar a figura deste cantautor e o seu vínculo com o nosso país.

A AJA-Galiza inaugurará a exposiçom “25 de Abril Sempre” com os cartazes comemorativos que cada ano se editam em Portugal desde a Revoluçom dos Cravos num ato previsto para a própria quinta 25 de abril às 17h00 na Fundaçom Granell, situada no paço de Bendanha, na praça do Toral de Santiago de Compostela. Precisamente, será na sala onde José Afonso tocou e interpretou as suas cançons de intervençom para um grande grupo de estudantes compostelanos en 1973, quando daquela estava o Círculo Mercantil neste prédio. Ao rematar, interpretará-se o ‘Grândola Vila Morena’ na praça do Toral.

Para a sexta 26, as atividades da AJA-Galiza serám organizadas em colaboraçom com a Gentalha do Pichel. Começarám às 17h00 com o espetáculo infantil “A formiga no carreiro”, de Vero Rilo e Sonsoles Penadique, que convida a fazer umha viagem polas terras da lusofonia para contar, cantar, bailar e brincar com os contos de tradiçom oral e a música do livro “Zeca para crianças” editado pola Escola de Ensino Galego Semente. A partir das 20h00 projetará-se “Foi na cidade do Sado”, um documentário de João Pires relativo a José Afonso e às suas vivéncias em Setúbal, que dará pé a um debate. As atividades seguirám com umha ceia, para a que é necessário anotar-se na Gentalha do Pichel, e com um concerto de Os Meninos.

O livro-disco “José Afonso ao Vivo”, que vem de ser editado em Portugal por José Moças, apresentará-se pola primeira vez na Galiza a segunda 29 de Abril às 19:30 na livraria Couceiro, de Santiago de Compostela. O próprio editor estará presente no ato para contar a descoberta destes dous concertos inéditos de José Afonso que reproduz.

Ademais, continua aberta a participaçom na I Bienal Internacional de Mail Art Zeca Afonso com a temática das línguas minorizadas para refletir situaçons de subordinaçom idiomática tanto do galego como das existentes noutras partes do mundo. As pessoas interessadas en participar têm de prazo até 1 de Maio; as bases e o endereço para enviar as obras artísticas estám disponíveis na web http://www.aja.gal

Unable to display Facebook posts.
Show error

Error: (#4) Application request limit reached
Type: OAuthException
Code: 4
Please refer to our Error Message Reference.
2019-04-23T12:05:27+02:00